पुणे :
उपमुख्यमंत्रीअजित पवार यांच्या पुढाकारातून पुणे महापालिका हद्दीत 23 गावे समाविष्ट करण्यासाठी देण्यात आलेल्या प्रस्तावाला नगरविकासमंत्री एकनाथ शिंदे यांनी मंजुरी दिली आहे. त्यामुळे लवकरच 23 गावं पुणे महापालिकेत समाविष्ट होतील. यासंदर्भात अध्यादेश काढण्याची प्रक्रिया सुरु होईल. त्यानंतर ही गावे महापालिकेत समाविष्ट होतील ,
34 गावे पुणे महापालिकेच्या हद्दीत समाविष्ट करण्याचा आदेश उच्च न्यायालयाने राज्य सरकारला दिला होता. त्यानंतर युती सरकारच्या काळात 11 गावे महापालिकेत समाविष्ट करण्यातही आली. उर्वरित गावंही टप्प्याटप्प्यानं महापालिकेत घेण्याबाबत शपथपत्रही देण्यात आलं होतं. त्यानंतर ही गावं महापालिकेत घेण्यासाठी उपमुख्यमंत्री अजित पवार यांनी पुढाकार घेतला. आता या निर्णयानंतर प्रस्ताव मंजूर करुन पुढील महिन्यात निर्णय जाहीर केला जाण्याची शक्यता आहे. पुणे महापालिकेत नव्याने समाविष्ट होणाऱ्या गावांच्या विकासासाठी पहिल्या टप्प्यातच 10 हजार कोटी रुपयांचा निधी लागेल, असं महापालिकेकडून सांगण्यात आलं आहे.
ती 23 गावे कोणती?
सूस
म्हाळुंगे
बावधन बुद्रूक
खडकवासला
किरकटवाडी
कोंढवे धावडे
मांजरी बुद्रूक
नांदेड
न्यू कोपरे
नऱ्हे
पिसोळी
शेवाळवाडी
काळेवाडी
वडाची वाडी
वाघोली
मांगडेवाडी
भिलारेवाडी
गुजर
निंबाळकरवाडी
जांभूळवाडी
होळकरवाडी
औताडे हांडेवाडी
मंतरवाडी
नांदोशी
पुणे महापालिकेत नव्याने समाविष्ट करण्यात येणाऱ्या गावांच्या विकारासाठी 9 हजार कोटी रुपयांची गरज लागणार आहे. त्यासाठी पुणे महापालिकेनं राज्य सरकारकडे 9 हजार कोटी रुपयांची मागणी केली आहे. दरम्यान, युती सरकारच्या काळात पुणे महापालिकेत समाविष्ट करण्यात आलेल्या 11 गावातील विकासकामं अद्याप प्रलंबित आहेत. त्या पार्श्वभूमीवर नव्याने समाविष्ट होणारे 23 गावं विकासापासून वंचित राहू नयेत, यासाठी महापालिकेला राज्य सरकारनं तातडीनं मदत करावी, अशी मागणी करण्यात आली. अन्यथा ही गावं टप्प्याटप्प्यानं समाविष्ट करावीत अशी भूमिका पुणे माहापालिकेनं घेतली आहे.
