वारजे :
महागाई, जीवनावश्यक वस्तूंवर जीएसटी, जनविरोधी आर्थिक धोरणे याचा निषेध करत आम आदमी पक्षाच्या कार्यकर्त्यांनी आज वारजे येथे अर्थमंत्री निर्मला सीतारामण यांच्या गाडीचा ताफा अडवला.
अचानक कार्यकर्ते रस्त्यावर आल्याने काही पोलीसही चक्रावून गेले होते. वारजे माळवाडी परिसरातील आपचे कार्यकर्ते निलेश वांजले यांच्यासह अनेक कार्यकर्ते यात सहभागी झाले होते. यावेळी या कार्यकर्त्यांनी महागाई विरोधात, केंद्र सरकारच्या आर्थिक धोरणांविरोधात आणि ऑपरेशन लोटस विरोधात घोषणा देण्यात आल्या. यानंतर आपच्या कार्यकर्त्यांना पोलिसांनी ताब्यात घेतले.
निर्मला सीतारामन यांच्या समोर कार्यकर्त्यांनी एकच घोषणाबाजी केली. देशासह राज्यात वाढलेल्या महागाईला जबाबदार कोण, अनेक वस्तूंवर वाढवलेली जीएसटी कमी करण्याची मागणी यावेळी या कार्यकर्त्यांनी केली आहे. गादिस्मोरून पोलिसांनी त्या कार्यकर्त्यांना ताब्यात घेत अर्थमंत्र्यांच्या ताफ्याला जाण्यास जागा करून दिली. यावेळी आपचे कार्यकर्ते आक्रमक झाल्याचे पहायला मिळाले.
