बाणेर :
पाषाण जवळील सूस खिंड जवळ निर्जन स्थळी एका व्यक्तीचा डोक्यात दगड घालुन खुन करणा-या संशयित आरोपींना ताब्यात घेऊन युनिट चारच्या गुन्हे शाखेने अवघ्या सहा तासात गुन्हा उघडकीस आणला.
गुरुवारी (ता.२९) पहाटे चतुःशृंगी पोलीस ठाण्याच्या हद्दीत खुनाच्या गुन्ह्याच्या अनुषंगाने पोलीस उपायुक्त (गुन्हे) अमोल झेंडे यांनी घटनास्थळी भेट देऊन सदरचा गुन्हा तात्काळ उघडकीस आणुन आरोपींना अटक करणेबाबत सुचना दिल्या होत्या. सदर सुचनांच्या अनुषंगाने गुन्हे शाखा युनिट-४ चे पोलीस निरीक्षक गणेश माने यांनी तपास पथक तयार करून मार्गदर्शन व सुचना देऊन तपास पथक रवाना केले.
मयताच्या डोक्यात दगड घातल्याने त्याचा चेहरा ओळखता येत नव्हता. तसेच त्याची ओळख पटविण्यासाठी कोणतेही कागदपत्र अथवा इतर ठोस माहिती उपलब्ध नव्हती. तरीदेखील युनिट- ४ चे अधिकारी व अंमलदार यांनी बाणेर परिसरात मयताची माहिती घेण्यासाठी परिसर पिंजून काढला. पोलीस उपनिरीक्षक जयदीप पाटील व पोलीस अंमलदार अजय गायकवाड हे मयताची माहिती घेत असताना त्यांना एका इसमाकडून मयताचे नाव संदीप शंकर शिंपी असल्याचे समजले. त्यांनतर तपास पथकातील इतर अधिकारी व अंमलदार यांनी गोपनीय व सखोल चौकशी अंती बुधवारी (ता.२८) संदिपला दोन इसमांनी बुलेटवर बसवून नेताना पाहिल्याची माहिती मिळवली.या माहितीच्या आधारे महाळुंगे (पाडाळे) येथून दोन संशयितांना चौकशीसाठी ताब्यात घेतले. संशयितांना विश्वासात घेऊन चौकशी केली असता सतिश रामभाऊ गि-हे, रा. सचिन पाडाळे चाळ, शितलादेवी मंदिराजवळ, महाळुंगे व दिपक विठ्ठल कोळेकर, रा.पॅनकार्ड क्लब रस्ता बाणेर या दोघांनी मिळून संदिपचा डोक्यात दगड घालून खुन केल्याची कबुली दिली.
संदिप हा त्याच्या पत्नीला दारु पिऊन सतत मारहाण, शिवीगाळ करीत असे. तसेच त्याच्या बायकोचा भाऊ (मेहुणा) सतिश गि-हे यास व त्याच्या घरच्यांना दारुच्या नशेत शिवीगाळ दमदाटी करीत असे. या कारणामुळे वैतागुन त्यास निर्जनस्थळी नेऊन त्याच्या डोक्यात दगड घालून खुन केल्याची कबुली संशयितांनी दिली. दिपक कोळेकर हा सतिश गि-हे याचा साडू असल्याचे चौकशीत निष्पन्न झाले.पोलीस उपायुक्त अमोल झेंडे, सहायक पोलीस आयुक्त नारायण शिरगावकर यांच्या मार्गदर्शनानुसार व सुचनेप्रमाणे पोलीस निरीक्षक गणेश माने, सहायक पोलीस निरीक्षक विकास जाधव, पोलीस उपनिरीक्षक जयदीप पाटील, पोलीस अंमलदार अजय गायकवाड, हरिष मोरे, सारस साळवी यांनी हा तपास केला.
