विद्यापीठ चौक :
गणेशखिंड रस्त्यावरील वाहतूक कोंडी फोडण्यासाठी प्रायोगिक तत्त्वावर तीन पर्यायी वर्तुळाकर पर्यायी मार्ग उपलब्ध करुन देण्यात आले आहे. विद्यापीठ चौकातून ओैंधकडे जाणाऱ्या वाहनचालकांनी पर्यायी मार्गांचा वापर करण्याचे आवाहन वाहतूक पोलिसांकडून करण्यात आले आहे.आचार्य आनंदऋषीजी चौकात (विद्यापीठ चौक) मेट्रोकडून उड्डाण पुलाच्या कामाचे लवकरच नियोजन असून, मेट्रोकडून अतिरिक्त बॅरिकेडिंग केले जाणार आहे.
त्यामुळे या ठिकाणी वाहतूक कोंडी होऊ नये यासाठी वाहतूक पोलिसांनी पुणे विद्यापीठ चौक व गणेश खिंड रस्ता परिसरातील वाहतूकीत बदल करण्याचे नियोजन केले आहे. हे नियोजन प्रायोगिक तत्वावर असून येत्या दोन ते तीन दिवसापासून हा बदल लागू होणार आहे. सावित्रीबाई फुले पुणे विद्यापीठ चौक, बाणेर रस्ता, पाषाण रस्ता, गणेशखिंड आणि सेनापती बापट रोड परिसरातील वाहतुकीत बदल करण्यात आला आहे. नागरिकांनी नियमांचे पालन करुन पर्यायी मार्गाचा वापर करावा असे आवाहन पोलिसांनी केले आहे.
असा असेल वाहतूकीत बदल
– बाणेर – औंध रस्त्याने विद्यापीठ चौकात येणारी वाहने विना सिग्नल शिवाजीनगरकडे डाव्या लेनने जाण्याचे प्रस्तावित आहे. विद्यापीठ चौक येथे पादचाऱ्यांना रस्ता ओलांडण्यासाठी वेळ दिला जाणार आहे.
– गणेशखिंड रस्त्याने सेनापती बापट रस्त्याकडे जाण्यासाठी याआधी कॉसमॉस बँक येथे यू टर्न होता. हा यू-टर्न बंद करुन सेनापती बापट रस्ता जंक्शन येथून उजवीकडे वळण्यास परवानगी दिली जाणार आहे.
– चतु:श्रृंगी मंदिर (सेनापती बापट रोड) येथून विद्यापीठ चौकाकडे जाणारी वाहतूक सेनापती बापट रोड जंक्शन येथून डावीकडे वळून सरळ पाषाणकडे वळविण्यात येणार आहे.
औंधकडे जाण्यासाठी पर्यायी रस्ते
पर्यायी वर्तुळाकार मार्ग 1 – गणेशखिंड व सेनापती बापट रस्त्याकडून पुणे विद्यापीठ, चतु:श्रृंगी पोलीस ठाणे, कस्तुरबा गंधी वसाहतीकडे जाणाऱ्या वाहनांनी पाषाण रस्त्याने सिंहगड गेट (पुणे ग्रामीण पोलीस मुख्यालय) येथून उजवीकडे वळून बाणेर रस्त्याने उजवीकडे वळून सरळ विद्यापीठ चौकातून डावीकडे वळून औंधच्या दिशेने जावे.
पर्यायी मार्ग 2 – पाषाण रस्त्याने अभिमानश्री सोसायटी, पाषाण रस्ता जंक्शन येथून उजवीकडे वळून अभिमानश्री सोसायटी, बाणेर रस्ता जंक्शन उजवीकडे वळून बाणेर रस्त्याने उजवीकडे वळून सरळ विद्यापीठ चौकातून डावीकडे वळून औंधकडे जावे.
पर्यायी मार्ग 3 – सेनापती बापट रोड कडून औंधच्या दिशेने जाणाऱ्या वाहनांनी पाषाण रस्त्याने अभिमानश्री सोसायटी, पाषाण रस्ता जंक्शन येथून उजवीकडे वळून अभिमानश्री सोसायटी. बाणेर रस्ता जंक्शन डावीकडे वळून बाणेर फाटा, उजवीकडे वळून सर्जा हॉटेल कॉर्नर डावीकडे वळून
क्रोमा मॉल रस्त्याने किंवा बाणेर फाटा उजवीकडे वळून आय.टी. आय रोडने परिहार चौकातून इच्छितस्थळी जावे.
राजीव गांधी पुलाकडून गणेशखिंडीकडे जाण्यासाठी पर्यायी मार्ग
– ब्रेमन चौकातून डावीकडे वळून स्पायरस कॉलेज रस्ता, आंबेडकर चौक, साई चौक, उजवीकडे वळून खडकी पोलीस स्टेशन रेल्वे अंडरपास डावीकडे वळून चर्च चौक, जुना पुणे-मुंबई महामार्गाचा वाहन चालकांना वापर करता येईल.
– पुणे स्टेशन, कोरेगाव पार्क, मुंढव्याकडून औंधच्या दिशेने
जाणाऱ्या वाहनांनी इंजिनीअरिंग कॉलेज उड्डाणपुलावरुन, वाकडेवाडी, पोल्ट्री फार्म चौक, चर्च चौकातून
डावीकडे वळून खडकी पोलीस स्टेशन अंडरपास येथून डावीकडे वळून मरिआई मंदिर, उजवीकडे वळून गोगादेव चौक, उजवीकडे वळून फुटबॉल ग्राऊंड, उजवीकडे वळून साई चौक, डावीकडे वळून आंबेडकर चौक, स्पायरस चौक, ब्रेमन चौकातून इच्छित स्थळी जावे.
