पुणे :
सावित्रीबाई फुले पुणे विद्यापीठाच्या आवारात प्रतिबंधात्मक आदेश लागू करण्यात आले आहे. 7 ते 21 नोव्हेंबर दरम्यान जमावबंदी लागू करण्याचा आदेश देण्यात आला असून, आदेशाचा भंग करणाऱ्यांवर कायदेशीर कारवाईचा इशाराही पोलिसांकडून देण्यात आला आहे.
विद्यार्थी संघटनांच्या कार्यकर्त्यांमध्ये झालेली हाणामारी,पंतप्रधान नरेंद्र मोदी यांच्याविषयी आक्षेपार्ह मजकूर लिहिल्याची तक्रार, राजकीय पक्षाच्या कार्यकर्त्यांकडून विद्यार्थ्यांना मारहाण अशा घटनांमुळे विद्यापीठात तणावाचे वातावरण आहे. या पार्श्वभूमीवर कुलसचिव डॉ. प्रफुल्ल पवार यांनी पुणे पोलिसांना पत्र दिले होते. त्यानंतर जमावबंदी लागू करण्यात आली आहे.
गेल्या काही दिवसांत सावित्रीबाई फुले पुणे विद्यापीठात विद्यार्थी संघटनांमध्ये मारहाणीच्या घटना घडल्या होत्या. त्या पार्श्‍वभूमिवर सहपोलिस आयुक्त संदीप कर्णिक यांनी हे आदेश लागू केले आहेत. आदेशातून विद्यापीठातील विद्यार्थी, शिक्षक, कर्मचारी, पोलिस अधिकारी, सुरक्षा अधिकारी यांना वगळण्यात आले आहे.
फौजदारी संहिता प्रक्रिया 1973 च्या कलम 144 नुसार विद्यापीठ आणि सभोवतालच्या शंभर मीटर परिसरात विद्यार्थ्यांशिवाय इतर व्यक्तींना एकत्र येण्यास, विद्यापीठात प्रवेश करण्यास प्रतिबंध, विद्यापीठ परिसरात दोन किंवा दोनपेक्षा जास्त व्यक्तींना एकत्र येण्यास मनाई करण्यात आली आहे.
