पुणे :
पुण्यामधील पब संस्कृती विरोधात महाराष्ट्र नवनिर्माण सेनेने आक्रमक भूमिका घेतली आहे. यासाठी महाराष्ट्र नवनिर्माण सेने कडून एक सही संतापाची आंदोलन सुरु आहे. पुण्याच्या गुडलक चौकात हे आंदोलन सुरू आहे. हिट अँड रन प्रकरणामुळे पब संस्कृती विरोधात मनसेने आंदोलन केले आहे.
पुण्यामधील कल्याणी नगर अपघातात बिल्डरच्या अल्पवयीन मुलाने एका दुचाकीला धडक दिल्याने दोन जण जागीच ठार झाले होते. मुलगा अल्पवयीन असल्याने त्याला लगेचच जामीन मिळाला होता. पण त्यानंतर लोकांनी नाराजी व्यक्त केली. उपमुख्यमंत्री देवेंद्र फडणवीस यांनी देखील याची दखल घेतली.
या अपघात प्रकरणात मुलगा, वडील आणि आजोबा असे तिघे ही जण तुरुंगात आहेत. मुलगा अल्पवयीन असताना देखील त्याला गाडी दिल्याने वडिलांवर गुन्हा दाखल झाला असून वडील विशाल अग्रवाल हे सध्या न्यायालयीन कोठडीत आहेत. दुसरीकडे आजोबांनी हा गुन्हा आपल्या अंगावर घ्यावा म्हणून त्यांच्या ड्राईव्हरवर जबरदस्ती केली आणि त्याला दोन दिवस डांबून ठेवल्याने सुरेंद्र अग्रवाल यांना देखील अटक झाली आहे. कोर्टाने त्यांना 28 मेपर्यंत पोलीस कोठडी सुनावली आहे.
कल्याणीनगर अपघाताच्या पार्श्वभूमीवर गेल्या तीन दिवसात राज्य उत्पादन शुल्क विभागाने धडक मोहिमेत शहरातील तसेच जिल्ह्यातील 49 पब आणि बारवर कारवाई करत गुन्हे दाखल केले आहेत. त्यातील बरेच पब आणि बार बंद करून सील करण्यात आले आहेत
