औंध :
औंध येथील शैलेश टॉवर येथे सोमवारी पहाटे ३ चोरटे शिरले असताना त्यांना पाहून घाबरुन पळणारे पोलीस हवालदार प्रविण रमेश गोरे आणि स्वत: जवळ रायफल असतानाही चोरट्यांना कोणताही प्रतिकार न करता चोरट्यांना पळून जाऊ देणारे पोलीस नाईक अनिल दत्तु अवघडे यांना पोलीस उपायुक्त नम्रता पाटील यांनी निलंबित केले आहे. चोरट्यांना पाहून पोलीस पळून गेल्याची मंगळवारी दिवसभर शहरात चर्चा होती. यामुळे शहर पोलीस दलाची बदनामी झाल्याचे मत वरिष्ठ पोलीस अधिकाऱ्यांनी व्यक्त केले. त्यामुळे या दोघा पोलीस कर्मचाऱ्यांवर तातडीने कारवाई करण्यात आली आहे.
हवालदार प्रविण गोरे आणि पोलीस नाईक अनिल अवघडे हे औंध येथे मार्शल म्हणून कर्तव्यास होते. शैलेश टॉवर येथे सुरक्षारक्षकाला मारहाण करीत असल्याची माहिती पोलीस नियंत्रण कक्षाला मिळाली. पोलीस नियंत्रण कक्षाने ही माहिती या दोघा बीट मार्शल यांना दिली. त्यानुसार हे मार्शल सव्वातीन वाजता त्या ठिकाणी पोहचले. त्यावेळी एसएलआर रायफल असणारे अवघडे मोटारसायकलवरुन खाली उतरले. त्याचवेळी शैलेश टॉवरच्या आवारातून ४ शस्त्रधारी चाकू, कटावणी व गज घेऊन या मार्शलच्या समोरुन जाऊ लागले. ते पाहून मोटारसायकलवरील गोरे यांनी आपले सहकारी अवघडे यांना तेथेच सोडून मोटारसायकल वळवून पळून गेले. चोरट्यांपैकी एकाने अवघडे यांना मारण्याकरीता त्यांच्या हातातील कटावणी उगारली व दुसऱ्याने गाडी निकालो और इनको ठोक दो असे म्हणाला. इतर चोरट्यांच्या हातात चोरीचे सामान होते. अवघडे यांच्याकडे एसएलआर रायफल असून देखील त्यांनी या चोरट्यांना अटकाव करण्याचा, पकडण्याचा प्रयत्न केला नाही. तसेच चोरटे पळून गेल्यानंतरही त्यांचा पाठलाग केला नाही.
या घटनेच्या सीसीटीव्ही फुटेज उपलब्ध असून चोरटे मुद्देमाल घेऊन जाताना त्यात दिसत आहेत. गोरे हे आरोपींना पाहून दुचाकीवरून पळून जाताना स्पष्ट दिसत आहेत. तर, घटनास्थळापासून १०० मीटर अंतरावर असलेल्या दुसऱ्या सीसीटीव्हीत गोरे हे आरोपींची कार निघून जाण्याअगोदरच सहकारी अवघडे यांना सोडून पळून गेल्याचे दिसत आहे. या घटनेत दोघांनी निष्काळजीपणा आणि कर्तव्यात कसूर केल्याचे दिसून येत आहे. त्यामुळे शिस्तबद्ध पोलीस खात्याची प्रतिमा मलीन केल्याचा ठपका ठेऊन दोघांवर निलंबनाची कारवाई केल्याचे आदेशात म्हटले आहे.
