नवी दिल्ली :
भारताने गुरुवारी ओडिशा किनाऱ्यावरील चांदीपूर येथे एकात्मिक चाचणी रेंजपासून (आयटीआर) 1000 किलोमीटरच्या अंतरासह आपल्या सबसॉनिक क्रूझ अण्वस्त्रवाहू क्षेपणास्त्राचे यशस्वी परीक्षण केले.
संरक्षण संशोधन व विकास संघटना (डीआरडीओ) च्या सूत्रांनी सांगितले की, हे क्षेपणास्त्र सकाळी 10.45 वाजता आयटीआर के IIIच्या संकुलातून प्रक्षेपित करण्यात आले.
भारताच्या निर्भय क्षेपणास्त्राची तुलना अमेरिकेच्या टोमाहॉक आणि पाकिस्तानच्या बाबर क्षेपणास्त्रांशी केली जात आहे. 300 किलोपर्यंत अण्वस्त्रे वाहून नेण्याची क्षमता आणि अत्याधुनिक तंत्रज्ञानाने सुसज्ज निर्भय हे जमीन, आकाश आणि पाण्याखालील पाणबुड्यांमधूनदेखील डागले जाऊ शकते. सूत्रांनी सांगितले की, दोन स्तरीय ‘निर्भय’ क्षेपणास्त्राने लक्ष्यासाठी आपल्या मार्गावर एक अनोखी ट्रॅजेक्टरी घेतली.
शत्रूच्या रडारला निर्भय सापडणे कठीण
जमिनीवर डागलेले क्षेपणास्त्र असल्याने शत्रूच्या रडारवरून निर्भय ओळखणे कठीण आहे. सूत्रांनी सांगितले की, हे क्षेपणास्त्र अनेक मिनिटे आपल्या लक्ष्य क्षेत्राभोवती घेरत राहते आणि योग्य वेळी योग्य ठिकाणी धडकते. या वर्षाच्या सुरुवातीला डीआरडीओने ओडिशाच्या चांदीपूर चाचणी केंद्रातून घन इंधन रॅमजेट क्षेपणास्त्र प्रणोदन प्रणालीची यशस्वी चाचणी केली.
डीआरडीओने निवेदनात म्हटले आहे की, बूस्टर मोटर आणि नोजल-लो मोटरसह सर्व उप-यंत्रणेने अपेक्षेप्रमाणे काम केले. सध्या एसएफडीआर क्षेपणास्त्र प्रोपल्शन तंत्रज्ञान जगातील काही देशांमध्येच उपलब्ध आहे. यापूर्वी 28 फेब्रुवारी रोजी भारतीय अवकाश संशोधन संघटनेने हिंद महासागर क्षेत्रात सैन्य आणि व्यापारी नौदल जहाजांच्या हालचालींवर नजर ठेवण्यासाठी डीआरडीओने विकसित केलेले ‘सिंधू नेत्रा’ उपग्रह प्रक्षेपित केले होते.
